60870: Eachainn Bochd

le Uilleam MacMhathain, Arivruach

Oran eibhinn mu fear a bha bhean ga h’arachaidh

A tale about a henpecked husband

Tha cailleach às a’ bhail’ againn
Abair g’eil i èibhinn
Bith ‘m bodach bochd toirt chasan leis
An dèidh dhith a bhith sèibheadh.

‘S ann càm a tha na fiaclan aice
‘S i ‘n còmhnaidh leis an èideadh
Tha cuid ag ràdh le cinnt, a ghràidh,
Gu robh i anns a’ Navy.

Tha teanga oir mar speal, a ghràidh
Gach madainn is i ‘g èirigh
Am bodach bochd ‘s a’ phìob aige
Tha e teich mus fhaigh i greim air.

Abair thus’ gur bèicear i
Le ‘currants’ agus ‘raisins’
‘Se duis is marag dhubh, a ghràidh
A gheibh thu is tu cèilidh.

Bidh is a’ falbh le baidhsaigeal
Sìos gu taigh Iain Sheumais
Tha fios gu faigh i dram’ aige
Thig i dhachaigh dannsa ‘s ag èigheachd.

Bithidh Eachainn bochd air falach oir
Air cùl cruach Dhòmhnaill Màiri
Chan fhaigh e bhon a’ phlaide nochd
Fhad’s tha ise mar a tha i.

Bha Eirig i le cneabailt’ oir
Bha fear aice air gach gualain
Bha dùil aice gur e ‘belt’ a bh’ann
‘Son a bhith ceangal basgaid mòineadh.

Dh’fhalbh i leotha a Chalanais
Gu òrduighean Mhicìomhair
Fhuair i lioft bho Thormoid Nis
Is sùil robach Aonghais Siarach.

‘S ann cumhang seat a’ ‘mhotorbike’
An dithis ac’ a bha dòigheil
A’ siubhail rathad Lacasaigh
Gus an do ràinig iad air còrnair.

Bha a’ Niseach e cho dall, a ghràidh
Dh’ionnsaidh Leumrabhagh a dh’fhalbh e
Cha d’fhuair i fhathast a Chalanais
Thill i dhachaigh, ach troimh Bharabhas.

Tha tàmailt mòr air Eachainn bochd
Na shuidhe aig ceann a’ bhàthach
Bha dùil gu faigheadh sìth a-nochd
Cha d’fhuair, ‘s chan fhaigh, gu bràth e.

Thig madainn ‘s bidh i trod, a ghràidh
‘S ma gheibh i greim air gràpa
Bidh ‘m bodach bochd air feannagan
Leis a’ bhò a-mach gu àirigh.

Bidh cuimhne aige nuair bha iad òg
Tighinn à Uibhist tron an Tairbeart
‘S e smuaintean gu robh crodh aige
Tòrr chearcan agus airgead.

Ach a’ mhionaid ràinig Steòrnabhagh
Bha e gu tilleadh gu Àrd-Àsaig
Às a ciall nuair fhuair i mach
Eachainn bochd ‘s ann às an Àird e.

Ah uill, sin mar a tha e, ghràidh
Tha cunnart agus èiginn
Nuair a gheibh thu tè à Ceann a’ Bhàigh
‘S chan e tè ghall à Dùn Èideann.

Bith cinnteach nach bith dram’ agad
‘S nach eil thu leis an èideadh
Cha bhith thu às do rian ‘san àite
Gheibh thu faochadh bho gach creutair.